هه‌‌ردوو یانه‌ی مانچسته‌ری ئینگلیزی و به‌رشه‌لۆنه‌ی ئیسپانی به‌سه‌ركه‌وتنه‌كانی ئه‌مشه‌ویان خۆیان نزیك كرده‌وه‌ له‌قۆناغی پێش كۆتایی یانه‌ پاڵه‌وانه‌كان.
شه‌وی ڕابردو دو ڕوبه‌ڕوبونه‌وه‌ی جیاواز له‌میانی یاریه‌كانی ڕۆشتنی قۆناغی چاره‌كی كۆتایی جامی یانه‌ پاڵه‌وانه‌كانی ئه‌وروپا له‌نێوان یانه‌كانی "ڕۆما"ی ئیتاڵی و "مانچسته‌ر یونایتد"ی ئینگلیزی له‌لایه‌ك و "شاڵگه‌"ی ئه‌ڵمانی و "به‌رشه‌لۆنه‌"ی ئیسپانی له‌لایه‌كی تره‌وه‌ ئه‌نجامدران.
یاری یه‌كه‌م كه‌له‌یاریگای ئۆڵۆمپی تایبه‌ت به‌یانه‌ی ڕۆما ئه‌نجامدرا، تیپی تۆپی پێی یانه‌ی مانچسته‌ر یونایتدی ئینگلیزی به‌سه‌ركردایه‌تی یاریزانی به‌توانای پرتوگالی "كریستیانۆ ڕۆناڵدۆ" توانیان سه‌ركه‌وتنێكی مه‌زن به‌ده‌ستبێنن و دوجار تۆڕی گۆڵی یانه‌ی به‌رامبه‌ریان بهه‌ژێنن، له‌كاتێكدا ڕۆناڵدۆ توانی له‌خوله‌كی "39" یه‌كه‌مین گۆڵ تۆماربكات و ڕۆنی ئینگلیزیش له‌خوله‌كی "66" دووه‌مین گۆڵی تۆماركرد، ئه‌م بردنه‌وه‌یه‌ش بۆ یانه‌ی ناوبراو هه‌نگاوێكی مه‌زنه‌و بناغه‌یه‌كه‌ بۆ یاری داهاتوو كه‌بتوانێت به‌ئاسانی سه‌ركه‌وتن بۆ قۆناغی نیوه‌ی كۆتایی پاڵه‌وانێتیه‌كه‌ مسۆگه‌ربكات.
له‌یاری دووه‌مداو له‌یاریگای "ئه‌رینا ئۆف"ی تایبه‌ت به‌یانه‌ی شاڵگه‌ی ئه‌ڵمانی، تیپی تۆپی پێی ئه‌و یانه‌یه‌ پێشوازی له‌یانه‌ی به‌رشه‌لۆنه‌ كرد، یاریه‌كه‌ له‌به‌رژه‌وه‌ندی یانه‌ی میوان "به‌رشه‌لۆنه‌" به‌ئه‌نجامی گۆڵێكی بێ به‌رامبه‌ر كۆتایی هات، گۆڵه‌كه‌ش یاریزانی لاوی ئیسپانی "بۆیان" له‌خوله‌كی 12"ی گێمی یه‌كه‌م تۆماریكرد، به‌مه‌ش یانه‌ی به‌رشه‌ له‌گه‌ڵ ئه‌وه‌ی دڵی هانده‌رانی ئاشتكرده‌وه‌ قۆناغێكی مه‌زنی بڕی به‌نزیك بونه‌وه‌ی له‌یاری نیوه‌ی كۆتایی پاڵه‌وانێتیه‌كه‌.
بڕیاره‌ ئه‌مشه‌ویش دوو یاری تر له‌هه‌مان خول و قۆناغی پاڵه‌وانێتیه‌كه‌ له‌نێوان یانه‌كانی "فه‌نه‌رباخجه‌"ی توركی و "چێڵسی" له‌نده‌نی له‌لایه‌ك و "ئه‌رسناڵ و لیڤه‌رپول"ی ئینگلیزی له‌لایه‌كی تره‌وه‌ ئه‌نجامبدرێت.
یاریه‌كانی گه‌ڕانه‌وه‌ی ئه‌م پاڵه‌وانێتیه‌ش له‌ڕۆژانی "8 و 9"ی ئه‌م مانگه‌ ئه‌نجامده‌درێت.

ئه‌ستێره‌ی‌ به‌ناوبانگی‌ ئاسمانی‌ فه‌ڕه‌نسایی‌ (زێنه‌دین زێدان) ڕایگه‌یاند كه‌ ئاماده‌ی‌ یاری‌ ڕێزلێنان و وازهێنانی‌ یاریزانی‌ هاونیشتیمانی‌ خۆی‌ (كریستیان كاریمبۆ) ده‌بێت .
یاریزانی‌ به‌ناوبانگ و به‌ژدار بووی‌ جامی‌ جیهانی‌ 1998 (كریستیان كاریمبۆ) ی‌ فه‌ڕه‌نسی‌ بڕیاریدا وازهێنانی‌ خۆی‌ له‌یاریكردن ڕابگه‌یه‌نێت, وه‌بۆ ئه‌و مه‌به‌سته‌یش هه‌ڵبژارده‌ی‌ فه‌ڕه‌نسا بڕیاری‌ دا ڕۆژی‌ دووشه‌ممه‌ له‌یاریه‌كی‌ ڕێزلێناندا ماڵئاوای‌ له‌به‌هره‌كانی‌ ئه‌و یاریزانه‌ بكات .
بۆ زیاتر ڕێزلێنانی‌ ئه‌و یاریزانه‌ كه‌به‌یاریچیه‌ ئه‌سمه‌ره‌كه‌ ناسراوه‌ چه‌ندین یاریزانی‌ به‌ناوبانگی‌ جیهانی‌ بانگهێشت كراون له‌وانه‌ش ئه‌ستێره‌ی‌ به‌ناوبانگ (زێنه‌دین زێدان) كه‌هه‌رزوو بڕیاری‌ به‌ژداری‌ كردنی‌ خۆی‌ له‌و یاریه‌دا ڕاگه‌یاندووه‌ .
زێدان وێڕای‌ به‌ژداری‌ كردنه‌كه‌ی‌ ڕۆڵی‌ یارزانه‌ ئه‌سمه‌ره‌كه‌ به‌رز ڕاده‌گرێت و به‌هۆكاری‌ به‌ده‌ستهێنانی‌ جامی‌ جیهانی‌ 1998 ی‌ ده‌زانێت كه‌فه‌ڕه‌نسا بووه‌ خاوه‌نی.

یانه‌ی چێڵسی ئینگلیزی له‌ هه‌وڵی به‌هێزكردنی زیاتری ریزه‌كانییدایه‌ و پلانی هه‌یه‌ بۆ كرِینی هه‌ردوو ئه‌ستێره‌ی به‌ناوبانگی تۆپی پێ، مێسی و كاكا.
ئه‌ڤرام گرانت رِاهێنه‌ری یانه‌ی چێڵسی ئینگلیزی له‌ تۆپی پێ، له‌ چاوپێكه‌وتنێكدا له‌گه‌ڵ رِۆژنامه‌ی (میرِه‌ر)ـی به‌رِیتانی رِایگه‌یاند: له‌ پلانی داهاتووماندا پێویسته‌ هه‌وڵه‌كانمان بخه‌ینه‌گه‌رِ بۆ هێنانی هه‌ر دوو یاریزان لیونێل مێسی له‌ یانه‌ی به‌رشلۆنه‌ و رِیكاردۆ كاكا له‌ یانه‌ی ئه‌ی سی میلان، هه‌روه‌ها ئه‌ڤرام ئه‌وه‌شی گوت:" ئه‌گه‌ر یانه‌ی چێڵسی سه‌ركه‌وتوو بێت له‌ هێنانی ئه‌و دوو یاریزانه‌، ئه‌وا دڵنیام یانه‌ی چێڵسی زۆر به‌ زه‌حمه‌ت تووشی شكست ده‌بێت و یاریگه‌ی (ستامفۆرد برێدیچ) سیمایه‌كی جوانتر به‌خۆیه‌وه‌ ده‌بینێت، به‌ بوونی ئه‌م دوو یاریزانه‌.
 له‌ پرسیارێكی رِۆژنامه‌كه‌شدا سه‌باره‌ت به‌ به‌ده‌ستهێنانی خولی پرێمه‌رلیگی ئینگلیزی له‌م وه‌رزه‌دا، گرانتی ئیسرِائیلی گوتی:" گومانی تێدا نییه‌ ئێمه‌ یانه‌یه‌كی به‌هێزین، بێ هیوا نه‌بووینه‌ و هێشتاش ده‌رفه‌تمان له‌پێشه‌ بۆ به‌ده‌ستهێنانی خولی نایابی ئینگلیزی بۆ وه‌رزی ئه‌مساڵ، ئه‌وه‌ی كه‌ ئێمه‌ ئێستا زۆر به‌ جیددی بیری لێده‌كه‌ینه‌وه‌ و له‌ به‌رنامه‌رِێژیی داین بۆی، پلاندانانه‌ بۆ داهاتوو.
 هه‌ر له‌درێژه‌ی لێدوانه‌كه‌یدا ئه‌ڤرام گرانت گوتی:" پێویسته‌ (رِۆمان ئیبراهیموڤیج) خاوه‌نی یانه‌ی چێڵسی، سستی نه‌نوێنێت له‌ هه‌وڵه‌كانی بۆ هێنانی ئه‌و یاریزانانه‌، كه‌ ده‌بنه‌ پاڵپشتییه‌كی گه‌وره‌ بۆ هێنانه‌دی خه‌ونه‌كانمان، هه‌روه‌ها گرانت ئه‌وه‌شی گوت:"ئێمه‌ ئێستا له‌ ئه‌ركێكی زه‌حمه‌تداین، چونكه‌ به‌ رِاستی هانده‌رانی یانه‌كه‌ زۆر به‌په‌رۆشن بۆ به‌ ده‌ستهێنانی یه‌كێك له‌ نازناوه‌كان، بۆیه‌ ده‌بێت هه‌وڵه‌كمان بۆ ئه‌وه‌ بێت كه‌ نابێت ئه‌مساڵَ به‌ ده‌ستبه‌تاڵی ماڵئاوایی له‌ ساڵی 2008 بكه‌ین.

ئۆرتیگای‌ ئه‌ستێره‌ی‌ پێشووی‌ تۆپی‌ پێی‌ ئه‌رژه‌نتین بۆ ماوه‌ی‌ مانگێك له‌منداڵه‌كانی‌ و خێزانه‌كه‌ی‌ دوورده‌خرێته‌وه‌ .
دوای‌ ئه‌وه‌ی‌ خێزانه‌كه‌ی‌ سكالاَ دژی‌ ئۆرتیگا تۆمارده‌كات به‌وه‌ی‌ كه‌ هه‌ڕه‌شی‌ لێكردووه‌ دادگای‌ ولاَتی‌ ئه‌رژه‌نتین بڕیاریدا ئۆرتیگای‌ یاریزانی‌ پێشووی‌ هه‌ڵبژارده‌ی‌ ئه‌رژه‌نتین و یانه‌ی‌ ڕیڤه‌رپله‌یتی‌ ئه‌و ولاَته‌ بۆ ماوه‌ی‌ مانگێك له‌ منداڵكانی‌ و خێزانه‌كه‌ی‌ دوربخاته‌وه‌.
هاوكات، دادگای‌ ئه‌رژه‌نتین به‌تۆمه‌تی‌ ئالوده‌بونی‌ به‌ماده‌ كحولیه‌كان و چه‌ندین ماده‌ی‌ قه‌ده‌غه‌كراوی‌ دیكه‌، ئۆرتیگای‌ سزا داوه‌ به‌ نزیك نه‌بوونه‌وه‌ به‌دووری‌ 300 مه‌تر له‌ماڵی‌ خێزانه‌ كه‌یه‌وه‌.
پێشتریش ئۆرتیگای‌ ته‌مه‌ن  34 ساڵ دانی‌ به‌وه‌داناوه‌ كه‌ له‌ ماوه‌ی‌ ڕابردوودا ئالوده‌ی‌ مادده‌ كحولیه‌كان بووه‌ به‌لاَم ته‌ئكیدی‌ كردۆته‌وه‌ كه‌ ماوه‌ی‌ ساڵ و نیوێكه‌ وازی‌ لێهێناوه‌.

ئاژانسی هه‌واڵی ئانسای ئیتاڵی ڕایگه‌یاند که‌وا یاریزانی یانه‌ی ڕۆمای پایته‌ختی ئیتاڵیا فرانچیسکۆ تۆتی به‌ هۆی پێکانه‌وه‌ ناتوانێط به‌ژداری بکات له‌یاری یانه‌که‌ی به‌رامبه‌ر به‌یانه‌ی مان یوانایتدی ئینگلیزی له‌خولی یانه‌پاڵه‌وانه‌کانی ئه‌وروپادا که‌وا بڕیاره‌ ئه‌و یاریه‌ سبه‌یشه‌و ساز بدرێت ، له‌هه‌واڵه‌که‌دا هاتوه‌ که‌وا کاپتنی ڕۆما له‌ یاری یانه‌که‌ له‌ خولی ئیتاڵیدا به‌رامبه‌ر یانه‌ی کالیاری هه‌ستی به‌ئازار کردوه‌ هه‌ربۆیه‌ نه‌یتوانیوه‌ یاریه‌که‌ ته‌واو بکات و دانیشتوه‌ وه‌ له‌پاش یاریه‌که‌ که‌ پشکنینی پزیشکی بۆ تۆتی کراوه‌ ده‌رکه‌وتوه‌ که‌ پێی چه‌پی ئازاری تیادایه‌و هه‌ندێ جومگه‌ی تووشی ووشکی هاتوون بۆیه‌ ده‌بێت تۆتی چاره‌سه‌ری بۆ بکرێت و ماوه‌ی 1 هه‌فته‌ یان زیاتر له‌ یاریگا دوور بکه‌وێته‌وه‌.

ه‌مڕۆ ڕۆژی‌ شه‌ممه‌ ڕۆژنامه‌ی‌ (سه‌ن) ی‌ به‌ریتانی‌ له‌هه‌واڵێكیدا بڵاویكرده‌وه‌ كه‌یاریزانی‌ هێرشبه‌ری‌ ئینگلترا (واین ڕۆنی‌) سروودی‌ نیشتیمانی‌ ووڵاته‌كه‌ی‌ ناخوێنێت .
ڕۆژنامه‌كه‌ زیاتر هه‌واڵه‌كه‌ی‌ ڕوونكردوه‌ته‌وه‌ و نوسیویه‌تی‌ (واین ڕۆنی‌) له‌به‌ر ئه‌وه‌ی‌ سروودی‌ نیشتیمانی‌ ووڵاته‌كه‌ی‌ خۆی‌ له‌به‌ر نیه‌ له‌كاتی‌ چوونه‌ نێو یاریگاكانه‌وه‌ ناتوانێت وه‌كو هاوڕێكانی‌ سرووده‌كه‌ ببێژێت, كه‌ئه‌مه‌یش له‌ڕووی‌ یاساییه‌وه‌ ده‌بێته‌ عه‌یبه‌ بۆ ئه‌و یاریزانه‌ .
هه‌ر له‌هه‌واڵه‌كه‌دا باس له‌وه‌ده‌كرێت كه‌ هانده‌رانیش لای‌ خۆیانه‌وه‌ یاریزانێكێان خۆشناوێت كه‌ گرنگی‌ به‌ ووڵاته‌كه‌ی‌ خۆی‌ نه‌دات .
له‌كۆتای‌ نوسینه‌كه‌ی‌ ڕۆژنامه‌كه‌دا ئه‌وه‌ هاتووه‌ كه‌ داوا له‌ بڕگه‌یه‌كی‌ یاسایی‌ ده‌كرێت بۆ ئه‌وه‌ی‌ بكرێته‌ كارێكی‌ پێویست كه‌یاریزانان سروودی‌ نیشتیمانی‌ ووڵاته‌كه‌یان له‌به‌ربکه‌ن.

 ڕاهێنه‌ری‌ پێشووی‌ یانه‌ی‌ چێڵسی‌ (خۆزیه‌ مۆرینهۆ) ڕایگه‌یاند كه‌به‌هیچ شێوه‌یه‌ك له‌گه‌ڵ یانه‌ی‌ ئه‌نته‌ر میلاندا له‌هه‌وڵی‌ لێك نزیك بوونه‌وه‌دا نه‌بوه‌ و به‌نیازیش نیه‌ له‌ئێستادا ئه‌وكاره‌ بكات .
له‌پاش ئه‌و هه‌واڵه‌ی‌ كه‌ له‌به‌شێك له‌ڕۆژنامه‌ وه‌رزشیه‌كانی‌ ئیتالیاوه‌ بڵاوكرایه‌وه‌ و تیایدا باس له‌وه‌كرا كه‌ یانه‌ی‌ (ئه‌نته‌ر میلان) ی‌ ئیتالی‌ له‌هه‌وڵی‌ گرێبه‌ستدایه‌ له‌گه‌ڵ ڕاهێنه‌ری‌ به‌توانای‌ پورتوغالی‌ (خۆزیه‌ مۆرینهۆ) به‌مه‌به‌ستی‌ گوێزانه‌وه‌ی‌ ناوبراو له‌وه‌رزی‌ نوێی‌ یاریكردندا بۆ ڕاهێنه‌رایه‌تی‌ یانه‌كه‌یان .
لای‌ خۆیه‌وه‌ مۆرینهۆ ئه‌مڕۆ سه‌رجه‌م ئه‌و هه‌واڵانه‌ی‌ ڕه‌تكرده‌وه‌و ووتی‌ ته‌نها پڕوپاگه‌نده‌یه‌, له‌درێژه‌ی‌ ووته‌كانیدا مۆرینهۆ ووتی‌ "هه‌تا ئێستا من سه‌رۆكی‌ یانه‌ی‌ ئه‌نته‌ر میلان (ماسیۆ مۆراتی‌) ناناسم و نه‌شم دیوه‌ له‌نزیكه‌وه‌, وه‌ئه‌و هه‌واله‌یشی‌ كه‌ده‌ڵێت گوایه‌ من له‌ڕۆژی‌ پێنج شه‌ممه‌ سه‌ردانی‌ میلانۆ ده‌كه‌م دووره‌ له‌ڕاستیه‌وه‌ .
جێگای‌ ئاماژه‌یه‌ كه‌له‌سه‌ره‌تای‌ ئه‌م مانگه‌وه‌ له‌ووته‌یه‌كیدا مۆرینهۆ له‌ شاری‌ ڤاله‌نسیای‌ ئیسپانی‌ ڕایگه‌یاند كه‌ ده‌خوازێت له‌ ئیتالیا یان له‌ ئیسپانیا گرێبه‌ستێك مۆر بكات له‌گه‌ڵ یه‌كێك له‌یانه‌کاندا.